महिन्याच्या सुरुवातीला सूर्याच्या जवळ असलेला बुध ग्रह नंतर सूर्यापासून दूर जात जात महिना अखेर पर्यंत १९ अंशापर्यंत जाईल तेव्हा आपण त्याला पाहू शकता. आपणास तो पश्चिम क्षितिजावर मिथुन तारकासमुहातील प्लक्ष तार्‍याच्या डाव्याबाजूला आढळेल. सूर्यापासून जास्त दूर नसल्याने फक्त चांगले निरभ्र आकाश असेल तरच आपण त्याला एखाद्या उंच ठिकाणाहून व्यवस्थित पाहू शकता.

या महिन्यामध्ये पहाटेच्या आकाशामध्ये दिसणारा शुक्र ग्रह. महिना अखेर पर्यंत सूर्याच्या अधिक जवळ गेल्याने नंतर तो आपणास सूर्य प्रकाशामध्ये लुप्त झाल्याने दिसणार नाही. महिन्याच्या सुरुवातीला सूर्योदयापूर्वी पूर्व क्षितिजावर पाहिल्यास आपणास मेष आणि वृषभ तारकासमुहांमध्ये तेजस्वी तार्‍याप्रमाणे चमकणारा शुक्र ग्रह आढळेल. त्याच्या तेजस्वीतेमूळे कुणाच्याही मदतीशिवाय आपण त्याला ओळखू शकता.

शुक्र ग्रहाप्रमाणेच मंगळ ग्रह देखिल या महिन्यामध्ये आपणास सूर्योदयापूर्वी पूर्व क्षितिजावर पहायला मिळेल. शुक्र ग्रहाच्या मदतीनेच आपण त्याला ओळखू शकता. आपणास तो शुक्र ग्रहाच्या थोडासा वर आढळेल. त्याच्या लाल रंगामूळे आपणास तो ओळखता येईल. दिनांक २० जून २०११ रोजी कृत्तिका तारकागुच्छाच्या थोडासा उजवीकडे आपणास मंगळ ग्रह आढळेल. दिनांक २९ जून २०११ रोजी चंद्रकोरीच्या थोडासा वर आपणास मंगळ ग्रह आढळेल.

महिन्याच्या सुरुवातीपासूनच सूर्यापासून दूर जात असलेला गुरु ग्रह महिना अखेर पर्यंत सूर्यापासून अधिकच दूर गेलेला असेल. महिना अखेरपर्यंत आपणास तो मध्यरात्री (वेळ - २.३० वा.) पूर्व क्षितिजावर मीन आणि मेष तारकासमुहांमध्ये उगविताना आढळेल. दिनांक २६ जून २०११ रोजी चंद्रकोरीच्या थोडासा खाली आपणास गुरु ग्रह आढळेल.

या महिन्यामध्ये शनी ग्रह आपणास सूर्यास्तानंतर डोक्यावरील आकाशामध्ये पहायला मिळेल. तर मध्यरात्री पर्यंत तो पश्चिम क्षितिजावर मावळताना आढळेल. हा महिनाभर आपणास तो कन्या तारकासमुहामध्ये आढळेल. दिनांक ११ जून २०११ रोजी अर्ध चंद्रबिंबाच्या थोडासा बाजूला आपणास शनी ग्रह आढळेल.

या महिन्यामध्ये युरेनस ग्रह मध्यरात्री (वेळ - २.३० वा.) पूर्व क्षितिजावर मीन आणि मेष तारकासमुहांमध्ये उगविताना आढळेल. आपणास तो मीन तारकासमुहातील मीन पंचका खाली आढळेल. दिनांक २४ जून २०११ रोजी अर्ध चंद्रबिंबाच्या थोडासा बाजूला आपणास युरेनस ग्रह आढळेल. दुर्बिणीशिवाय आपणास हा ग्रह पाहता येणार नाही.

या महिन्यामध्ये नेपच्युन ग्रह मध्यरात्री (वेळ - १२.३० वा.) पूर्व क्षितिजावर कुंभ तारकासमुहांमध्ये उगविताना आढळेल. दिनांक २१ जून २०११ रोजी अर्ध चंद्रबिंबाच्या थोडासा खाली आपणास नेपच्युन ग्रह आढळेल. दुर्बिणीशिवाय आपणास हा ग्रह पाहता येणार नाही.