सूर्यग्रहाणाची छायाचित्रे पहाण्यासाठी इथे क्लिक करा.

दिनांक २२ जुलै २००९ रोजी होणारे सूर्यग्रहण हे "खग्रास सूर्यग्रहण" आहे. म्हणजेच या दिवशी पृथ्वीवरील ज्या भागातून हे 'खग्रास सूर्यग्रहण' दिसणार आहे त्या भागातून सूर्य पूर्ण झाकलेला दिसेल. हे सूर्यग्रहण भारतातून सुरू होवून नेपाळ, बांगलादेश, भुतान, म्यानमार आणि चीन येथून दिसत जपान येथील ऱ्हाक्यू बेटांवरून प्रशांत महासागर या भागांमध्ये दिसणार आहे. संपूर्ण ग्रहणाचा काळ ६ मिनिटे ३९ सेकंद एवढा असेल.

खालील चित्रामध्ये दाखविल्याप्रमाणे मधल्या निळ्या ठळक रेषेच्या पृथ्वीवरील शहरांमध्ये संपूर्ण खग्रास सूर्यग्रहण पाहायला मिळेल. तर या व्यतिरिक्त या निळ्या ठळक रेषेच्या बाजूला दाखविलेल्या फिकट निळ्या रेषेच्या जागेमधील शहरांमध्ये हे सूर्यग्रहण खंडग्रास स्थितीमध्ये पाहायला मिळेल.

संपूर्ण भारतातून हे सूर्यग्रहण दिसणार असले तरी निरनिराळ्या राज्यांमधून हे सूर्यग्रहण कमी-अधिक स्वरूपामध्ये पाहायला मिळेल. महाराष्ट्रातून हे ग्रहण सूर्योदयासोबत ग्रासलेल्या अवस्थेमध्येच सुरू झालेले दिसेल. खालील जागेमध्ये मुंबई तसेच महाराष्ट्रातून हे ग्रहण पहाटे सूर्योदयानंतर कसे दिसेल याचे ऍनिमेशन दाखविलेले आहे.

चंद्राचा पृथ्वीभ्रमणमार्ग साधारण ५ अंशांनी कललेला असल्याने चंद्र दर वेळेला जरी पृथ्वी आणि सूर्य यांच्यामध्ये आला तरी त्याची सावली पृथ्वीवर पडत नाही, त्यामुळे फक्त त्याच वेळी सूर्यग्रहण पाहायला मिळते जेव्हा चंद्र, पृथ्वी आणि सूर्य यांच्यामध्ये आल्याने त्याची सावली पृथ्वीवर पडते.